[center]بطلت حاجات كتير

ده فعلا اجمل قرار وصلت له علشان الضغط ما يعلاش

بدايه الحكايه لما كنت بانفعل مع الاحداث

وعندي رغبه قويه في محاربه السلبيات

وانتهت الحكايه بضغط دم مرتفع والام في جميع اجزاء الجسم احتارت فيها دكاتره الباطنه

وشخصها الاطباء النفسيين انها الام نتيجه الضغط العصبي

من هنا كان القرار

اني ابطل انفعل واتنرفز

علشان كده بطلت اقرا جرايد الحكوميه والمعارضه علي حد سواء

بطلت اتفرج علي التلفزيون وخصوصا السهرات الدراميه

اللي تحولت بقدره قادر لمسلسل من 33 حلقه

ونشرات الاخبار علي جميع قنوات العالم

بطلت اتكلم عن الكوره وخصوصا فريق الزمالك اللي باشجعه لانه ده لوحده بيخلي الضغط 300 علي 150

بطلت اتكلم عن الفلوس وقلتها ومحاوله حل المعادله الصعبه ازاي المصروف يبقي اكبر من الايراد

بطلت اتواجد في اي مجال موجود فيه العنصر النسائي لان ده سبب قوي جدا في ارتفاع ضغط الدم لما يتميزن به من اسلوب مميز في حرق الدم

بطلت اسمع شكاوي الناس من العيشه والحياه لاني ببساطه مش مؤسسه ايتام ولا دار للمسنين واللي فيا مكفيني

بطلت افكر اني اتجوز لاني ببساطه لا املك مصاريف الجواز من شقه لـ اوده نوم لـ سفره لـ ......الخ

بطلت ادور علي شغل يناسب امكانياتي كمحاسب خريج تجاره وقررت اشتغل اي حاجه انشالله اصلح بوابير جاز

بطلت اخش سينما لان اخر فيلم محترم شوفته في السينما كان اسماعيل يس في مستشفي المجانين

ولسه اللسته كبيره

يعني باختصار اصبحت السلبيه هي الصفه السائده في تصرفاتي وسلم لي علي عبده مشتاق

بس اخر حاجه بطلتها

بطلت السجاير ورجعت لها تاني